தமிழ்நாட்டின் திருச்சி மாநகரிலிருந்து திரு சந்திரசேகரனை ஆசிரியராகக் கொண்டு வெளிவரும் ‘இனிய நந்தவனம்’ மாத இதழ், வருடாந்தம் நடத்தும் பன்னாட்டு மாணவர்களுக்கான சாதனை விருதுகள் வழங்கும் விழா கடந்த மாதம் திருச்சி மாநகரில் சிறப்பான முறையில் நடைபெற்றது.
மேற்படி மாணவர்களுக்கான சாதனை விருதுகளைப் பெற்ற கனடா வாழ் மாணவ மாணவிகளுக்கு விருதுகளை வழங்கும் சிறிய வைபவம் கடந்த 7ம் திகதி ஞாயிற்றுக்கிழமையன்று பிற்பகல் ஸ்காபுறோ நகரில் எக்ளிங்டன் வீதியில் அமைந்துள்ள ஶ்ரீ சீரடிசாயிபாபா ஆலய மண்டபத்தில் நடைபெற்றது.
திரு. திருமதி நரேன்-சசிகலா தம்பதியினரும் ஆலய தொண்டர்களும் ஏற்பாடு செய்த இந்த விருதுகள் கையளிக்கும் வைபவத்தில் கனடா உதயன் பத்திரிகையின் பிரதம ஆசிரியரும் கலந்து கொண்டு விருதுகளை சாதனை செய்த மாணவர்களுக்கு கையளித்தார். சமூக ஆர்வலர் திரு விசு கணபதிப்பிள்ளையும் அங்கு வருகை தந்திருந்தார்.
பெற்றோர்கள் மற்றும் சமூக ஆர்வலர்கள் என அங்கு சமூகமளித்தவர்கள் அனைவரும் மிகவும் மகிழ்ச்சியோடு விருதுகள் பெற்ற மாணவ மாணவிகளை பாராட்டிச் சென்றனர்.
