யாழ்ப்பாணம் உரும்பிராயில் இயங்கும் இரசாயன உரக் கலப்பில்லாத வீட்டுத் தோட்ட முகவர் நிலையத்திற்கு கனடாவின் TORONTO VOICE OF HUMANITY அமைப்பு வழங்கிய ஆதரவின் மூலம் யாழ்ப்பாணம் திருநெல்வேலி மற்றும் உரும்பிராய் ஆகிய பகுதிகளில் வாழும் வருமானம் குறைந்த நான்கு குடும்பங்களுக்கு இரசாயன உரக் கலப்பற்ற காய்கறிக் கன்றுகள் வழங்கப்பெற்றன.
யாழ்ப்பாணம் உரும்பிராயில் சில வருடங்களுக்கு முன்னர் கனடாவில் வாழும் திரு சிவக்கொழுந்து மகேந்திரன் என்னும் அன்பர் ஆரம்பித்த இந்த இரசாயன உரக் கலப்பில்லாத வீட்டுத் தோட்ட முகவர் நிலையம் ஆயிரக்கணக்கான காய்கறிக் கன்றுகளை இயற்கைப் பசளை கொண்டு வளர்த்து மக்களுக்கு விநியோகிக்கத் தொடங்கியுள்ளது. அங்கு மிகக் குறைந்த விலைக்கே இந்தக் கன்றுகள் விற்பனை செய்யப்படுகின்றன.
கத்தரி, மிளகாய், வெண்டைக்காய், கறி மிளகாய், பாகற்காய் போன்ற பல வகை காய்கறிக் கன்று இங்கு விதை போட்டு வளர்க்கபபட்டு தற்போது விநியோகம் செய்யும் காலத்தில் உள்ளன.
இவ்வாறான கன்றுகளின் ஒரு தொகுதியை அங்குள்ள வருமானம் குறைந்த குடும்பங்களுக்கு வழங்கி ஆதரவு வழங்க வேண்டும் என்ற திரு சிவக்கொழுந்து மகேந்திரனின் வேண்டுகோளை ஏற்று, கனடாவில் இயங்கும் சேவை நோக்கம் கொண்ட அமைப்பான TORONTO VOICE OF HUMANITY நிறுவனம் நான்கு குடும்பங்களுக்குத் தேவையான காய்கறிக்கன்றுகளை விலை கொடுத்து வாங்கி அங்கு இடம்பெற்ற சிறிய வைபவத்தில் பயனாளிகளுக்கு கையளிக்கப்பெற்றன. இந்த காய்கறிக் கன்றுகளுக்குரிய கட்டணத்தை TORONTO VOICE OF HUMANITY அமைப்பிற்கு கனடாவில் வழங்கியவர் திரு வாசன் பரமேஸ் என்னும் கணக்காளர் ஆவார்.
அண்மையில் நடைபெற்ற இந்த வைபவத்தை மேற்படி இரசாயன உரக் கலப்பில்லாத வீட்டுத் தோட்ட முகவர் நிலையத்தில் மேற்பார்வையாளர்களாகப் பணியாற்றும் சுதர்சன் மற்றும் விமல் ஆகியோர் ஏற்பாடு செய்தனர். அங்கு சிறப்பு விருந்தினர்களாக கலந்து கொண்டு ஆசியுரை வழங்கிய அருட்தந்தை ஜனகன் மற்றும் அருட்தந்தை ஜோன் போல் ஆகியோர் கனடா வாழ் அன்பர் திரு சிவக்கொழுந்து மகேந்திரனின் சேவை நோக்கத்தையும், மற்றும் TORONTO VOICE OF HUMANITY மனித நேய அமைப்பின் சமூக அக்கறையையும் அன்பளிப்பை வழங்கிய கனடாவைச் சேர்ந்த கணக்காளர் வாசன் பரமேஸ் அவர்களின் தாராள எண்ணத்தையும் பாராட்டி உரையாற்றினார்கள்.
இங்கே காணப்படும் படங்கள் அங்கு எடுக்கப்பெற்றவையாகும். இதே போன்று யாழ்ப்பாண மாவட்டத்தில் எந்த ஒரு கிராமத்திலும் வருமானம் குறைந்த குடும்பங்களுக்கு இவ்வாறான காய்கறிக் கன்றுகளை இலவசமாக வழங்க உதவி புரிய எண்ணும் அன்பர்கள் திரு சிவக்கொழுந்து மகேந்திரனை 437 335 5424 என்னும் இலக்கத்திலும் அல்லது TORONTO VOICE OF HUMANITY அமைப்பின் இயக்குனர் சபை உறுப்பினர்களை 416 732 1608 அல்லது 416 270 4343 ஆகிய இலக்கங்களிலும் தொடர்பு கொள்ளவும்.
