கொழும்பு துறைமுகத்திலிருந்து இந்தியாவின் மேற்கு வங்க மாநிலத்திலுள்ள ஹல்தியா துறைமுகத்தை நோக்கி பயணம் செய்து கொண்டிருக்கின்ற ஒரு கப்பலில் எண்ணைக் கசிவு ஏற்பட்டு கடல் மாசடைவது அவதானிக்கப்பட்டுள்ளதாக சம்பந்தப்பட்ட அதிகாரிகள் இலங்கை இந்திய அரசுகளுக்கு அறிவித்துள்ளார்கள் என அறியப்படுகின்றது.
.கொழும்பு துறைமுகத்திலிருந்து கடந்த 16ம் திகதி புதன்கிழமை இந்தியா நோக்கி புறப்பட்டுச்சென்ற போர்த்துக்கல் கொடியுடனான எம்.வீ.டெவோன் என்ற சரக்குக் கப்பலில் எண்ணெய் கசிவு ஏற்பட்டுள்ளதாக இந்திய கடலோர காவல்படை உறுதிப்படுத்தியுள்ளது. இந்தத் தகவல் இலங்கை வெளிநாட்டு அலுவல்கள் அமைச்சுக்கும் அறிவிக்கப்பட்டுள்ளது என செய்திகள் தெரிவிக்கின்றன.
இந்திய கடல் எல்லைக்கு உட்பட்ட கிழக்கு கடல் வலயத்தில் இந்த எண்ணெய் கசிவு ஏற்பட்டுள்ளதாக அந்த அறிக்கையில் மேலும் தெரிவிக்கப்பட்டுள்ளது.
சென்னையிலிருந்து 250 கடல்மைல் தொலைவிலுள்ள கடற்பகுதியில், சுமார் 10 கிலோலீட்டர் (10 KL) எண்ணெய் கடலில் படிந்துள்ளதாக இந்திய கடலோர காவல் படை தெரிவிக்கின்றது.
கப்பலின் எரிபொருள் தாங்கியில் ஏற்பட்ட கசிவின் காரணமாக, அதிலிருந்த எரிபொருள் கடலில் படிந்துள்ளதாக இந்திய கடலோர காவல் படை மேலும் தெரிவித்துள்ளது.
எனினும், எம்.வீ. டெவொன் கப்பல் தடையின்றி பயண இலக்கை நோக்கி பயணத்தை தொடர்வதாகவும், நிலைமை தொடர்பில் பொறுப்பான அனைத்து தரப்பினருக்கு அறிவுறுத்தியுள்ளதாகவும் காவல்படை மேலும் தெரிவித்துள்ளது. இதேவேளை, இந்த எரிபொருள் கசிவு தொடர்பில் கொழும்பு சமுத்திர மீட்பு மற்றும் இணைப்பு மத்திய நிலையத்தினால் கடலோர காவல்படைக்கு அறிவிப்பட்டதாக இந்திய தொலைக்காட்சிகள் அறிவித்துள்ளன. இந்த கப்பலில் 10, 795 டன் 382 மொத்த நிறையுடைய கொள்கலன்கள் ஏற்றிச்செல்லப்படுவதாகவும், வெவ்வேறு நாடுகளைச் சேர்ந்த பணியாளர்கள் 17 பேர் அடங்குகின்றனர் என்றும் தெரிவிக்கப்பட்டுள்ளது.
