மன்னாரில் சுய தனிமைப்படுத்தலில் உள்ள குடும்பங்களுக்கு நிவாரணப்பொருட்கள் உரிய நேரத்தில் வழங்கப்படுவதில்லை

மன்னார் நகர சபை உறுப்பினர் குற்றச்சாட்டு

மன்னார் நிருபர்

(30-06-2021)

மன்னார் மாவட்டத்தில் ‘கொரோனா’ தொற்று காரணமாக சுய தனிமைப் படுத்தப்படுகின்ற குடும்பங்களுக்கு அரசாங்கத்தினால் வழங்கப்படும் நிவாரணப் பொருட்கள் உரிய நேரத்தில் உரிய முறையில் வழங்கப்படுவதில்லை என மன்னார் நகர சபை உறுப்பினர் திருமதி சிறிதரன் அந்தோனியம்மா குற்றம் சுமத்தியுள்ளார்.

-குறித்த விடையம் தொடர்பாக இன்றைய தினம் புதன் கிழமை(30) ஊடகங்களுக்கு கருத்து தெரிவித்த போதே அவர் அவ்வாறு தெரிவித்தார்.

-அவர் மேலும் தெரிவிக்கையில்,,,

கொரோனா தொற்றினால் பாதிக்கப்பட்ட குடும்பங்களை தனிமைப்படுத்தி விட்டு அவர்களை வெளியே செல்ல வேண்டாம் என தெரிவிக்கின்றனர். அதனால் அத்தியாவசிய பொருட்களை வாங்க முடியாத நிலை ஏற்படுகின்றது. அவ்வாறு தனிமைப்படுத்தினாலும் அரசாங்கத்தினால் வழங்கப்படும் உலர் உணவு பொருட்களைக் கூட உரிய அதிகாரிகள் முதல் வாரத்தில் வழங்குவதில்லை.

அரச சார்பற்ற நிறுவனங்களும் , பொது அமைப்புக்களும் அரசாங்கத்தினால் தனிமை படுத்தப்பட்ட குடும்பங்களுக்கு உலர் உணவு பொருட்கள் கிடைப்பதாக நினைத்து தனிமை படுத்தப்பட்ட குடும்பங்களை கருத்தில் கொள்வதில்லை.

இதன் காரணமாக தனிமைப்படுத்தப்பட்ட எத்தனையோ குடும்பங்கள் பசி பட்டியினால் வாடி வருகின்றனர்.

இந்த அரசாங்கம் தனிமைப்படுத்தப்பட்ட குடும்பங்களுக்கு பத்தாயிரம் ரூபா (10.000) பெறுமதியான உலர் உணவு பொருட்கள் வழங்குவதாக செய்திகள் வெளி வந்தாலும் மன்னார் மாவட்டத்தில் ஐயாயிரம் ரூபா பெறுமதியான உலர் உணவு பொருட்கள் மாத்திரமே வழங்கி கொண்டு இருக்கின்றார்கள்.

அதுவும் தனிமைப்படுத்தப்பட்டு பத்து நாட்கள் கடந்த பின்னரே வழங்குகின்றனர். முதல் வாரத்திலேயே தனிமைப் படுத்தப்பட்ட குடும்பங்களைச் சேர்ந்தவர்கள் அத்தியாவசிய பொருட்கள் இல்லாமலும் வாங்க முடியாமலும் மிகவும் கஸ்ரத்திலேயே இருக்கின்றனர்.

அயல் மாவட்டமான வவுனியாவில் பத்தாயிரம் ரூபா பெறுமதியான உலர் உணவு வழங்குகின்றனர். ஒரு காணிக்குள் இரண்டு அல்லது மூன்று குடும்பங்கள் இருந்தாலும் அவர்களுக்கும் பத்தாயிரம் ரூபா பெருமதியான அத்தியாவசிய பொருட்கள் கொடுக்கின்றனர்.

ஆனால் மன்னார் மாவட்டத்தில் ஒரு காணிக்கள் எத்தனை குடும்பங்கள் இருந்தாலும் ஐயாயிரம் ரூபா பெருமதியான பொருட்களே வழங்குகின்றனர.; அதுவும் 10 நாட்கள் கடந்த பின்னரே வழங்குகின்றனர்.

எனவே மன்னார் மாவட்டத்தில் உள்ள சம்மந்தப்பட்ட அதிகாரிகள் குறித்த விடயம் தொடர்பாக உடனடியாக கவனம் செலுத்தி அரசினால் வழங்கப்படுகின்ற பத்தாயிரம் ரூபா பெறுமதியான பொருட்களை முழுமையாகவும் உரிய நேரத்திலும் வழங்க முன்வர வேண்டும் என கோரிக்கை விடுத்துள்ளார்.

மேலும் தனிமைப்படுத்தல் ஆரம்பிக்கின்ற முதல் வாரத்திலேயே குறித்த அத்தியாவசிய பொருட்களை வழங்க முன்வர வேண்டும் என அவர் உரிய அதிகாரிகளிடம் கோரிக்கை முன் வைத்துள்ளமையும் குறிப்பிடத்தக்கது.