யாழ்ப்பாண பொருளாதார மத்திய நிலையத்தின் மூன்றாவது `திறப்பு விழா`

வடக்கு–கிழக்கு விவசாய பொருளாதாரத்தின் உண்மையான நெருக்கடிகளை மறைக்கும் `அரசியல் நாடகம்`

எழுதியவர்: ஈழத்து நிலவன்

யாழ்ப்பாணம் மட்டுவில் அமைந்துள்ள விசேட பொருளாதார மத்திய நிலையமானது, சில தினங்களுக்கு முன்னர் மூன்றாவது தடவையாக திறப்பு விழா கண்டது. கொடியவனான கோத்தபாயா ராஜபக்சே ஆட்சிக்காலத்தில் ரூபா 198.80 மில்லியன் செலவில் கட்டப்பட்ட இந்த மத்திய நிலையத்திற்கு முன்னர் அவனது அண்ணன் மஹிந்த ராஜபக்சே, அங்கயன் இராமநாதன், பின்னர் ரணில் விக்ரமசிங்கே காலத்தில் காதர் மஸ்தான், டக்ளஸ் தேவானந்தா ஆகியோரின் முன்னிலையில் திறப்பு விழா நடத்தப்பட்டது. இப்போது ஜேவிபியின் அமைச்சர் வசந்த சமரசிங்க மற்றும் சந்திரசேகரன் ஆகியோரின் முன்னிலையில் அதே மத்திய நிலையம் மீண்டும் திறக்கப்பட்டிருக்கிறது.

ஆனால் இந்த “திறப்பு விழா நாடகங்கள்” அனைத்தும் பொது நிதியிலேயே நடத்தப்பட்டு வருகின்றன. இதற்கிடையில் வடக்கு–கிழக்கின் விவசாய பொருளாதாரம் கடுமையான அழிவைச் சந்தித்துக் கொண்டிருப்பதைப் பற்றி எந்த அரசியல்வாதிகளும் சிந்திக்கவில்லை.

✦. வடக்கு–கிழக்கின் விவசாய பங்களிப்பு – வரலாற்றுப் பின்னணி

வடக்கு–கிழக்கு மாகாணங்கள் இலங்கையின் விவசாய உற்பத்தியின் முதுகெலும்பாக இருந்துள்ளன.

▪︎ மொத்த உள்நாட்டு விவசாய உற்பத்தியில் 20.5% பங்கு வடக்கு–கிழக்கு என்னும் தமிழர் தாயகத்தினால் வழங்கப்பட்டது.

▪︎ மொத்த நெல் உற்பத்தியில் 1/3 பங்கு வடக்கு–கிழக்கு என்னும் தமிழர் தாயக விவசாயிகளால் உற்பத்தி செய்யப்பட்டது.

▪︎ கால்நடை வளர்ப்பில், நாட்டின் மொத்தக் கால்நடைகளில் 60% வடக்கு–கிழக்கு என்னும் தமிழர் தாயகத்தில் காணப்பட்டன.

இதனால், தேசிய உணவுப் பாதுகாப்பு, பால் உற்பத்தி, நெல் உற்பத்தி ஆகிய துறைகளில் வடக்கு–கிழக்கு என்னும் தமிழர் தாயகத்தினால் வழங்கப்பெற்ற பங்களிப்பு மிகுந்த முக்கியத்துவம் வாய்ந்தது.

✦. நில ஆக்கிரமிப்புகளின் தொடக்கம் – இராணுவம், திணைக்களங்கள், சமயத் தலைவர்கள்

இன்று அந்த வளமான நிலங்கள் பெருமளவில் ஆக்கிரமிக்கப்பட்டு கிடக்கின்றன.

▪︎ யாழ்ப்பாணம் வலி வடக்கு – 2,600 ஏக்கர் நிலம் இராணுவ ஆக்கிரமிப்பில்.

▪︎ காங்கேசன்துறை – 500 ஏக்கர் நிலத்தில் இராணுவம் தானாகவே விவசாயம் செய்து வருகிறது.

▪︎ கிளிநொச்சி வட்டக்கச்சி, முல்லைத்தீவு தேரா, மன்னார் வெள்ளாங்குளம், வவுனியா செட்டிகுளம் – குறைந்தது 13 பண்ணைகள் இராணுவக் கட்டுப்பாட்டில்.

▪︎ முல்லைத்தீவு மாவட்டம் – 32,110 ஏக்கர் நிலம் வனவள திணைக்களத்தால் ஆக்கிரமிக்கப்பட்டுள்ளது.

▪︎ முல்லைத்தீவு மாவட்டம் – 23,515 ஏக்கர் நிலம் வனஜீவராசிகள் திணைக்களத்தால் அபகரிக்கப்பட்டுள்ளது.

▪︎ திருகோணமலை குச்சவெளி – 70,039 ஏக்கர் விவசாய நிலம் வனவள திணைக்களம் வசப்படுத்தியுள்ளது.

▪︎ அதேபோல் பாணமுரே திலகவன்ச தேரர், கல்கமுவ சாந்தபோதி தேரர் ஆகியோர் நூற்றுக்கணக்கான ஏக்கர் நிலங்களை கைப்பற்றியுள்ளனர்.

இதோடு, வன்னி பிரதேசத்தில் 732 விவசாயக் குளங்கள் வனவள திணைக்களத்தால் ஆக்கிரமிக்கப்பட்டுள்ளன.

✦. பொருளாதார விளைவுகள் – விவசாயிகளின் வாழ்வாதார இழப்பு

இந்த நில ஆக்கிரமிப்புகள் வடக்கு–கிழக்கின் ஆயிரக்கணக்கான விவசாயிகளின் வாழ்வாதாரத்தை அழித்துவிட்டன.

▪︎ இராணுவம் முல்லைத்தீவு மாவட்டப் பண்ணைகளில் ஆண்டு தோறும் 15 மில்லியன் ரூபா, கிளிநொச்சி பண்ணைகளில் 13 மில்லியன் ரூபா வருமானம் ஈட்டுகிறது. ஆனால் அதன் பயன் விவசாயிகளுக்குக் கிடைக்கவில்லை.

▪︎ 370,000 கால்நடைகளுக்கான மேய்ச்சல் நிலங்கள் மறுக்கப்பட்டதால் பால் உற்பத்தி கடுமையாக பாதிக்கப்பட்டுள்ளது.

▪︎ மட்டக்களப்பில் 300,000 கால்நடைகள் மேய்ச்சலுக்குப் பயன்படுத்திய நிலங்களில் இருந்து தமிழர்கள் விரட்டப்பட்டுள்ளனர்.

இதன் விளைவாக, விவசாய உற்பத்தி குறைந்து கொண்டே செல்கிறது, ஆனால் விவசாயிகளின் வறுமை அதிகரித்துக் கொண்டிருக்கிறது.

✦. அரசியல் நாடகம் – திறப்பு விழாக்கள், ஆனால் தீர்வு இல்லை

மஹிந்த ராஜபக்சே முதல் ஜேவிபி வரை, எல்லா அரசியல்வாதிகளும் ஒரே மாதிரியாக பொது நிதியை வீணடித்து திறப்பு விழாக்கள் நடத்துகின்றனர்.

▪︎ நில ஆக்கிரமிப்புகள், விவசாயப் பண்ணைகள், குளங்கள், மேய்ச்சல் நிலங்கள், நீதிமன்ற தீர்ப்புகள் ஆகியவற்றைப் பற்றி யாரும் சிந்திப்பதில்லை.

▪︎ ஜேவிபி அதிகாரத்தில் ஒரு வருடம் கடந்தும் எந்த தீர்வும் வழங்கப்படவில்லை.

இது அரசியல் காட்சிநாடகம் மட்டுமே என்பதை வெளிப்படுத்துகிறது.

✦. சந்தை மற்றும் இறக்குமதி நெருக்கடிகள்

வடக்கு–கிழக்கில் பாரம்பரியமாக ஆண்டுக்கு மூன்று முறை உற்பத்தி செய்யப்பட்ட சின்ன வெங்காயம் இன்று ஒரு முறை மட்டுமே பயிரிடப்படுகிறது.
அதற்கிடையில் அரசு அறுவடை காலத்திலேயே இறக்குமதி அனுமதி வழங்கியது.
இதனால் விவசாயிகள் கடுமையான இழப்பைச் சந்தித்தனர்.

மேலும், அரிசி, பால், காய்கறி, வெங்காயம் போன்ற அடிப்படை உணவுப் பொருட்களுக்குக் கூட இறக்குமதி சார்ந்த பொருளாதாரம் உருவாகிவிட்டது.

✦. உலகளாவிய மாற்றங்கள் – உற்பத்தி சார்ந்த பொருளாதாரம்

இன்றைய உலகம் முழுவதும் நாடுகள் தங்களது உள்நாட்டு உற்பத்தியை வலுப்படுத்தும் திசையில் நகர்கின்றன.
ஆனால் இலங்கை, குறிப்பாக வடக்கு–கிழக்கு விவசாயப் பகுதிகள், உற்பத்தியை முற்றிலும் புறக்கணித்து இறக்குமதி சார்ந்த அடிமைத்தனத்திற்கு தள்ளப்பட்டுள்ளன.
இதனால் தேசிய உணவுப் பாதுகாப்பு அச்சுறுத்தலுக்குள்ளாகி வருகிறது.

வடக்கு–கிழக்கு என்னும் தமிழர் தாயகத்தினால் விவசாய பொருளாதாரம் ஒருகாலத்தில் தேசிய உற்பத்தியில் முதுகெலும்பாக இருந்தது. ஆனால் இன்று இராணுவ ஆக்கிரமிப்புகள், வனவள திணைக்கள அபகரிப்புகள், அரசியல் அலட்சியம், சந்தை நெருக்கடிகள் ஆகியவற்றால் அந்த பொருளாதாரம் முற்றிலும் சிதைந்துவிட்டது.

கேள்வி: திறப்பு விழா நடத்தும் அரசியல்வாதிகள் யாரேனும் இந்த விவசாய நிலங்களை மீட்டு, பண்ணையாளர்களுக்கு ஒப்படைக்கும் துணிச்சலைக் காட்டுவார்களா?
உண்மை: வடக்கு–கிழக்கின் விவசாய நிலங்கள் மீட்கப்படாவிட்டால், தேசிய உணவுப் பாதுகாப்பும், தமிழ் மக்களின் வாழ்வாதார உரிமையும் நிச்சயம் அழிந்துவிடும்.

✒️ எழுதியவர்: ஈழத்துத் நிலவன்

தமிழ் தேசிய வரலாற்றாசிரியர் | உலக அரசியல், பொருளாதாரம் மற்றும் இராணுவ ஆய்வாளர்
02/10/2025